بعد سبع سنوات , أسبوع كامل بدون موبايل
بعد سبع سنوات , أسبوع كامل بدون موبايل
قررت أستغل العزل المنزلي عن طريق عمل عزل عن الهاتف الجوال ايضا لمدة أسبوع, القرار مو سهل كان بس قررت بدون أي تفكير
شفت الفرصة مراح تتكرر, صار اكثر من سبع سنوات 24 ساعه الموبايل مفتوح وبأيدي ,وحتى لو ردت اطفي فماكنت اكدر اطول اكثر من يوم او يومين و اكيد لازم يكون بلعطل علمود باقي الايام كنت احتاجه للعمل او الدراسه. واعرف هوايه مرات يكون نصف الضغط الي اشعر بيه هو من ورا الهاتف والمسجات والكروبات والمشاكل الي بيه.
حمدلله كدرت استغل العزل بفدشي زين انو ابتعد عن الموبايل مدة اسبوع وكدرت اسيطر على نفسي.التجربه حلوه كثير و اتمنى الكل يجربها.احلى شي انو تحس براحة بال وحرية, لان مرات كثير كنت احس الموبايل مسيطر عليه, كل دقيقه يجذبني لنفسه ولازم اشوف اذا اكو مسج او لا, اذا احد سوالي لايك او لا,حتى لو مجنت انتظر شي من احد. كنت اضيع ساعات ع الانستكرام بدون ماحس .واكيد اندم على هلوقت.
اني ماحب احد يخليني ضعيفه حتى اذا كان الموبايل ومو شخص, لازم تتعلم كيف تحكم بنفسك وتصرفاتك . وماكو علاج للتعلق الا ان تجبر نفسك تبتعد فتره و تعيش حياتك بدون هلشي المتعلق بيه, مثل الادمان بلضبط, ومن ترجع راح تحس في تغيير كثير ملحوظ , واهم شي راح تفتخر بنفسك
بس اكيد راح يرجعلك الادمان ورا فتره ,خصوصا على السوشيال ميديا, المهم انو تتحكم بهلأدمان, وهنا كم نقطه مهمه من
تجربتي الخاصه للتحكم باستعمالك للسوشيال ميديا والموبايل
اغلاق الهاتف في العطل ليوم واحد او حتى خمس ساعات، المهم اغلاقه لفتره معينه
مسح الانستكرام يوم او يومين , ومسح اي تطبيق اخر مدمن عليه
تحميل تطبيق Stay Focused
التطبيق كولش مفيد وانشالله راح اتكلم عليه بلتفصيل مستقبلا
اذا تستخدم ايباد ,فمن الاحسن انو تمسح تطبيقات السوشيال ميديا (للتصفح) وليس التواصل , مثل الانستكرام و الفيسبوك و تنزيله فقط على الايباد
اغلاق الاشعارات الغير مهمه , وفقط ابقاء اشعارات المكالمات والرسائل الخاصه
Comments
Post a Comment